2Sa 19 | KYC | STEP | Kiŋi Dapiti baa Epesalomena lao ee lao kumanda petamo lao Joape lamaiyaminyi siya.

2 Samuel 19

Joape Dapiti Kando Pii Poraiyuo Leya

1 Kiŋi Dapiti baa Epesalomena lao ee lao kumanda petamo lao Joape lamaiyaminyi siya. 2 Kiŋi doko banya ikinyingi doko kondo kumanda petamo leyami doko sepala Dapitinya akali malu dupwa rae maiyuo wini pingi renge paleya doko alowa pipala mona randame kumuo kumandako peteyami. 3 Nakama yanda singi dupwa yandana pakao nyisa papala elyapala elya kalo karenge dopale ingyuo yuu taone dokona elya kalo sukusa dee peyami. 4 Dokopa kiŋi dokome banya lenge kambu yambe pyapala ee poraiyuo lao lao, O nambana ikinyingi. Nambana ikinyingi Epesalome. Epesalome nambana ikinyingi, lao ee leya.

5 Dokopa Joape baa kiŋinya anda papala kiŋi doko kando lao, Epapu embena akali dupwa koo pepeya ingyuo wasinyi pyambuo pelyamo. Akali embena ikinyi wanenyepe lete nyiminyipape dee embena etene dupwape enda lapo konda pyuo nyingi dupwape lete nyiminyi dupwa koo inginyi nembapi kandapi. 6 Embame wambu emba mona retaminyi dupwa kando yanda pimwailini. Dee emba kando rae mai nami wambu dupwa kando mona minyarambu karalene. Embena akali mupwa dupwape mee akali dupwape angi mende daa lao suu pilini. Nambame Epesalome baa epapu lete epapala namwa peparae kumamwali doko emba kuki rae maipili lamo lao kandelyo. 7 Epapu papala embena akali dupwa anjiki pyuo pii lamaila pare. Dopa pii nare ramo doko nambame Kamongona kingi lao rakya yangama dokona mendaki mendepe embamoo role kara narami, leto. Emba palu karenge yuu gii dupwana randa andake koo nao palu karare, leya. 8 Dokopa kiŋi doko roya karapala yuu taone dokona kame kambu repeta peteya. Banya akali dupwame baa dokona petamo leyami doko sepala nakama peparae dokona pao malu palyiyami.

Dapiti Kanda Soo Kamba Kapu Kyuo Jerusaleme Peya

Yuu gii dokopa Isaraele peparae ralo wakale wakale pyuo nakama rangena anda dupwana peyami. 9 Yuu Isaraele dokona peparae nakama range lao laiya lao apyanda pyuo lao nakama range lao lao, Kiŋi Dapitimi namwana nyisu petenge dupwa pipya kyawa lete nyiya. Namwa Pilisitia wambu pipya kyawa lete nyiya kande. Epapu Epesalomena reke lao ralo papala yuu yaki nyuo pelyamo, leyami. 10 Namwa akali Epesalome doko namwana kiŋi ingyara lao kyawa dokona mamba kulimbuo kisakamyuo rombo palyiyama. Dopa pyuo rombo palyiyamanopape baa yanda dokona piyaminyisa kumuya. Dokona lao akipamo mendeme kiŋi Dapiti doko kamba minyuo dae eparamo dokona lao laa nalyamisi? leyami.

11 Pii doo Isaraele wambu leyaminyi doko Dapiti keta waiya lao peya. Dopa piyamosa baame purisi akali Satoko Apiatapame Juta akali mupwa dupwa piso sela pena leya. Isaraele akali namba kiŋi dee karapili lao suu pilyaminyipape akipamo nakama enakana kiŋi doko banya anda dokona minyuo eparami ingilyase? 12 Nakama nambana ree palu, Nakama nambana yongo mendare dee ranjama mendaki. Dokona nakamame akipamo namba enakana lanyuo eparamisi? leya. 13 Dapitimi Amasa lamainya lao lamaiyuo, Emba nambana ree palu. Epapu dakepa nambame emba Joapena panda joo yanda singi dupwana mupwa ingyuo karape leto. Nambame dopa pii naro ramo dokopa nambana Anatumi namba randa jinya leto, leya. 14 Nakama Dapitinya pii doko sepala Juta akali peparae mona piyasa baa keta mona maiyuo pyamalyapala baamoo banya akali mupwa dupwa peparaepe kamba kapu kyuo epena leyami.

15 Baa kapu kyuo epeyamo dokopa katasa ipwa Jotane pona dokona Juta akali lapo yuu Gilikale dokona kiŋi akali ipwa dokona yalo lanyala epeyaminyi dupwa kando nyiya. 16 Yuu gii mendaki dokopako Benjamenena rara akali Simai lenge Gerana ikinyingi yuu Bakurimi range doko ipwa Jotane dokona Dapiti kando nyela epeya. 17 Epo dokopa Benjamenena akali rara taosande mendaki (1,000) dee akali Sipa lenge Solena ree palu dokona kendemande karenge dokopa dee banya ikinyingi akalisa ipisu kingi paki dusipape dee banya kendemande akali akalisa lama pipala nyuo ipwa Jotane dokona kiŋi doko kando nyela epeyami. Epeyaminyi dokopa kiŋi baa banya akali dupwape ene epapa nayaminyisa nakama ipwa Jotane dokona epeyami. 18 Nakama kiŋi andake dokope banya wambu pipya epeyaminyi dupwape ipwa doko yalo lanyala epo dee kiŋi dokome leyamuli pyuo pirama lao ipwa yalo peyami.

Dapitimi Simai Kando Anjiki Piya

Kiŋi doko ipwa dokona yalo panya rapa rapa piyamo dokopa akali Simaimi baa range pyakao papala kiŋinya lenge kambu siyamo dokona pangu siya. 19 Sepala lao, Emba kiŋi andake doko, yuu Jerusaleme yaki nyinyi yuu gii dokopa nambame kopetame piyu doko nyuo kame sakape. Dokona dee nambapa yanda pimwaiyuo minyaro karo suu pyao karalu kara napipi. 20 Namba koo piyuŋu doko namba silyu. Renge dokona namba mendaki dokoko yuu dulurena rara dokona piso epapu epapala emba kiŋi doko yako lao nyela epelyo, leya.

21 Leyamo dokopa akali Apisai Seruyana ikinyingi dokome ketae palyuo pii lao, Kamongo dokome kiŋi karena lao wasiyamo doko keta koo mende palena leyamo dokona Simai baa pyao kumakamana, leya.

22 Dopa leyamopape Dapitimi Apisaipa banya yangonge Joapepa lamaiyuo lao, Nakambana suu pingi doko apimi piso silyase? Nakambame namba randa jelana letambisi? Namba dake epapu Isaraele wambunya kiŋi ingyuo karo dokona epapu Isaraele wambu kuki mende kumunya lao randa mai narama, leya. 23 Lapala baame Simai lamaiyuo lao, Nambame emba pyao kumaka narami lao lalu lao langilyu, leya.

Dapitimi Akali Mipiposeta Kando Anjiki Piya

24 Dokopa Mipiposeta Solena kauwange akali doko kiŋi doko yako lao nyela epeya. Doko baa kiŋi doko Jerusaleme yaki nyiyamo yuu gii dokopa Mipiposeta banya angasipi kyawasipi dupwa rokwa nao dee kimbu dupwa wate pii nao komau dupwa wate pii naope piyamopa pao kiŋi doko wini pipala kamba kapu kyuo epeya. 25 Mipiposeta baa kiŋi doko yako lao nyero lao Jerusaleme piso epeyamo dokopa kiŋi dokome baa lamaiyuo lao, Mipiposeta akipamo emba nambapa role pyao epa naese? leya.

26 Baame isingi lao, Emba kiŋi andake doko, nambana kimbu dolapo koo doko emba silini. Dokome namba embapa role pyao parambaŋa lapala nambana kendemande akali doko lamaiyuo, Nambana mena donge dokona piso embapa role parambaŋa komau kwuo rapa rapa pyakana leyonopape baame namba kyambo langipala pyaka naya. 27 Emba kiŋi andake doko. Baame nambana lao kyambo langiya. Dopa leyamopape emba Anatunya aŋala dopale dokome embame kandarene rolara dupwa pepe. 28 Emba kiŋi andake doko. Nambana rakanena ree palu dupwa peparae kokwa soo kumunginya pyambuili doko rolae ingiyali. Dopa piyamopape embame embena rate dokona nenge nala ipu lee kande. Emba kiŋi andake doko. Nambame emba keta anjiki pyuo nyisa laope bange mendepe jii lao piso serono kata mende see nalyamo, leya.

29 Dokopa kiŋi dokome isingi lao, Emba dee kamba lama konda pyuo laa nare ingilyamo. Embapa Sipapa Solena bange dupwape dee yuu dupwape mokwa soo nyerambi lao suu pyao otapu, leya.

30 Mipiposetame isingi lao, Sipa baa dupwa peparae nyinya kae, Emba kiŋi andake doko anda lete ipi dokona namba rae mailyu. Dokona mende nyii naro, leya.

Dapitimi Akali Basilai Kando Anjiki Piya

31 Akali Basilai yuu Giliate range doko opetaeko yuu Orokelimi yaki nyuo kiŋi doko ipwa Jotane keno epena piyamo doko nyiso nyela epeya. 32 Basilai baa akali alemo. Baa ee kana akalisa mange lama (80) ingiya. Doko baa ama akali kamongo ingyuo bange malu retenge. Dokome kiŋi doko yuu Makanaime dokona peteyamo dokopa nenge dupwa maiya epeya. 33 Epeyamo dokopa kiŋi dokome baa lamaiyuo lao, Nambame emba rapu piruŋu Jerusaleme namba role pyao bona epena leya.

34 Dopa leyamopape Basilaimi isingi lao, Namba yuu gii malu palu kara naro doŋo. Emba kiŋi andake dokopa namba akipamo Jerusaleme parambase? leya. 35 Namba ee kana akalisa mange lama (80) karamo dokona dee bange mendeme namba rae mainyi pyambwa nara. Namba ipwa nengepe napu dupwana rende pingi palipyamo naa nalyo. Dee kenane pyami dupwa see nalyo. Emba kiŋi doko nambame emba randa jisasaroŋo daa leya. 36 Nambame yano andake dupwa nyii naro ingilyamo. Dokona lao namba mee kuki lama emba role pyao ipwa Jotane keno unipili papala kaeyo emba puu larole, leya. 37 Lapala nambana anda papala nambana ree palu dupwana malu anda repeta kumaro kapu kyuo parole. Dake nambana ikinyingi Kimikame lenge embena yulu pyakara. Emba role nyuo lanyuo pupi. Emba kiŋi andake doko, embame keyange lao suu pilini dupwa banya lao pyakamipi, leya.

38 Kiŋi dokome isingi lao, Nambame baa lanyuo papala yulu embame pipili lao suu pilini dupwa piru. Dee embame mende pyaka lao piso serene dupwa pyakaro, leya. 39 Dokopa Dapitimoo banya akali dupwa pipya ipwa Jotane doko yalo dumurena peyami. Dokopa baame akali Basilai doko nyinyi pipala yako lao elyape keta pisiyamopa anda kapu kyuo peya.

Juta Wambu Dupwape Isaraele Wambu Dupwape Kiŋi Dokona Lao Apiyanda Piyami

40 Kiŋi doko ipwa yalo oteyamo dokopa Juta akali peparaemepe dee Isaraele akali pingyasi lapomepe baa kako pyao nyiso minyuo peyami. Baa yuu Gilikale dokona peyamo dokopa akali Kimikame baa dokona role pyapeta peyambi. 41 Dokopa Isaraele peparaeme kiŋi peteya dokona papala baa kando lao, Emba kiŋi andake dokope embena ree palu wambu dupwape embena akali dupwape akipamo namwana yangonge Juta akali dupwame keyange pilyamano lao suu pyao nakama nyepala Jotane yalo minyuo rapu pyuo pumisi? leyami.

42 Juta akali dupwame isingi lao, Namwa doo pimwano doko kiŋi doko namwa pipya mendarendeme pimwaŋa. Dokome nakama akipamo imbu singi manjinyi pyambwarase? Baame namwa nenge ropo pyao joo dee bange mende joope pii napya, leyami.

43 Leyaminyi dokopa Isaraele akali dupwame isingi lao, Kiŋi Dapiti baa nakamana rara angingyuo karapyamopape namwa rara akalisa karo nakama mendaki iki isa palyilyamano. Dokona lao akipamo nakamame namwa kilya kando lao karamisi? leyami. Lapala namwa wambo suu pyao kiŋi doko dae lanyala eparama lao leyama doko kame see nalapape, leyami.

Leyaminyipape Juta range dupwame Isaraele wambunya pii isa palyili lao poraiyuo leyami. ^{▼▼ 20:1—21:22Yuu Isaraele dokona randa wakale wakale Dapiti keta epeya. Banya wambu lapo liti pyuo baa mata maiyuo kareyami. Dee lopo soo yanda pyuo kareyaminyipape Dapiti baa kapa palyuo kareya.}